Mukak Tepayan

Nya alai lama aku tu udah ngenong tulong ngetu,
Nya alai tak bediri lama ngeju,
Tak irau ati temati kutu,
Ditekang pengabang bala saribu,
Laban jawang aku udah tetentang ka radai punggang ampang bali mengkudu kuta tu,
Ke begamal lendu-lendu.
Nya alai enda bula meh indu kita ditu,
Ke beberita pandai di chunggai tunjok antu,
Keba deh pua lebor api kita tu,
Ke dipuji bala kami lumor satu.
Patut deh indu kita ditu ka beberita pandai di chunggai tunjok antu,
Lalu dipuji kami tukang landik nengkebang,
di-inang Kumang, ditulong Lulong seduai Puyu.
Keba ampang punggang bali besudah kita tu,
Ba tengah di-engkah ka iya gambar gajai antu,
Betunga moa enggau apai sepatu balu,
Keba deh pua bali berinjan enti siang hari tau bemunyi inggar berangingit,
Enti malam hari iya tau bemunyi demeram inggar nyaru,
Munyi ka minta sapu orang enggau empurong bebulu datai ari ulu batang kayan.
Nya alai lama meh aku tu udah ngenong tulong tekenyit,
Nya alai tak lama ngetu chegit-chegit,
Laban tambai aku telampai ka radai punggang ampang pua sungkit,
Digantong kita ba moa kitai ke betugong dudok berakit,
Nya alai aku tepeda ka buah mua pemanah-manah,
Keba ditengah nya diengkah ka kita gambar gajai langit,
Ti malam hari baka ke tau bemunyi sengit-sengit,
Munyi ka minta kachit ka kita buah pinang kunchit ke sesiet mulai ka tandan.
Nya alai bala kami tak ngetu lama ngenong,
Nampai punggang ampang bali belumpong enggi kita tu,
Dia deh kami tapeda ka gambar rusa manjong, kijang engkajong,
Punggu pumpong, puni tekuyong batang santan.
Nya kami lama ngenong dudok mengkadah,
Nentang ampang pua bali besudah enggi kita ditu,
Tak mua pemanah-manah,
Peda kitai ba tengah diengkah ka kita gambar kijang nyangkah, punggu rebah,
Rusa nengkadah puni buah melanjan buban.
Nya alai naka tu meh nemu muji pua bali engkudu enggi kita ditu,
Nya alai enti pulai ka menoa kami empu di Batang Paku,
Tentu kena puji aku lumor satu, Ke saribu nadai ngelaban.
Nya alai naka tu meh aku nemu muji buah pua bali belulai enggi kita ditu,
Enti aku pulai tentu bisi indu kami datai nemuai ngambi teladan.
Nya alai ke tu unggal asai ke tau aku ngelar diri Gelanyang Manang Mepa,
Mantai ka semilu batu bepanga,
Dikena ngabas utai ke enda dipeda,
Ngicha mata aku ngelala.
Nya alai tu unggal asai ka tau aku ngelar diri Gelanyang Manang Matai,
Mantai ka semili batu chanai,
Dikena aku nampai utai ti dilalai,
Nyangka ukor tepegai nemu nama.
Nya alai ka tu unggal,
Sapa indu kita ditu ke pandai di kechunggai ujong kukut,
Ke tau ngadu ka ai irup tak lebih nyamai ari ai singut,
Laban ai singut bisi nyambil bau lukut dan tapang.
Sapa indu kita ditu unggal ke bangat pandai di kechunggai jari ngengam,
Ke tau bayam ai beram tak lebih nyaman ari ke nelan ai renyuan,
Ulih nyagam di dalam tikong bekandang.
Sapa indu kita ditu unggal ke bangat pandai di kechunggai jari dua,
Ke tau ngira ai bisa tak berasai nyamai tama nyawa,
Tak lebih ari aku ti ngirup ai gula,
Nama ngapa ai gula bisi ngaba bau lang.
Kati ko tu deh unggal,
Enda tau ngasoh aku luput tu?
Enggau orang ka Libut Anyut Lembut,
Dijeput kering digelam.
Kada enda tau ngasoh aku nyaia tu unggal,
Enggau orang ka nanga Labu Anja,
Ke bebuah niap pernama ninting bulan.
Nya alai laban tapa ujong kudong aku tu unggal,
Enda kala ngempong jajebong ujong sarang,
Laban randa aku enda kala nerima jalong sua tuntong timang lemambang,
Laban tapa jari megai enggi aku tu unggal wai,
Nadai kala enggau orang nyapai sentagai dilah kendawang,
Nya alai enda aku tau enggau orang nyarau tangkai ranyai begitang.

Sumber : Lihat