Bebiau maik manik

Nya alai tuboh tu endang udah maioh,
Kaban endang udah kena pesan,
Ari tu endang udah dianti,
Antu endang diasoh nemu,
Selampandai endang diasoh datai,
Selempeta endang diasoh meda,
Petara endang diasoh ngemata ka pengawa kitai.O-Hoi! O-Hoi! O-Hoi! Nama utai tak ngakak munyi tajai,
Tak ngembau munyi ruai,
Malai di tatai balai gambang,
Tak nidit munyi landai,
Tak nyapa munyi orang.
Nama utai ka meletup munyi bedil,
Tak temegum munyi bandir.
Nama utai ke meraok munyi kijang,
Tak merap munyi bruang.
Oh… nadai nya utai ditanya,
Nya ga munyi tempap manok kepiat,
Nempap selingap selangka dada,
Kukok manok jagok ke engkukok inggar didinga.
Nya ga tegu iko manok kelabu,
Ke merundu lebat nyelabaya.
Nya ga manok labang ngambi mansang,
Manok tawai ngambi nandai,
Manok pagah datai madah ka seru jako pekirum pesan anak mensia.
Nya alai aku tu ngangau ka orang,
Ti di batu jarua kena pansa beras kuning,
Pandang perenching jalai raya,
Dibandong engkeramba gaga Keling,
Ke landik bepencha sasipa nyaga kota,
Nait ka bukit lubang sawa,
Numbok ka tuchong sandong gemala,
Ke segenda tampak terang.
Nya menoa dipangkang Santukan Buban,
Brumah di tengan pintu bulan,
Kejeman nyelam rau,
Ka dua bali nama Sempiti api,
Ngemata ka kunchi seput saribu.
Nya pan kena tesau, kena kangau,
Kena tunggah, kena padah,
Kena kumbai, kena sanggai.
Ni kita ka di dan tegelam pugok,
Ke pesok teling-teling,
Begamal lenok-lenok baka penudok wouk empeliau arang,
Bungkong ngembong, bungkong pesok,
Tebok bubok kumbang nerantang.
Nya menoa dipangkang Selandik,
Tukol setik bekaul takang,
Kadua bali nama Salenda tukol tempa,
Ke betempa rentang-rentang.
Nya alai Selampandai tuai manang,
Pan udah ga diambi aku nandai nurun ngabang.
Agi ga aku ngangau orang di lempa tebelian pungga ngelema maioh arang,
Tinggang kerang brangan padi,
Kadua nama di tuchong rintai benong peti menanyi.
Nya menua dipangkang Selampetoh,
Betuboh maioh ngamboh mulai,
Dipangkang Selampeta panempa ngaga kitai.
Nya alai udah datai meh bala Selampandai,
Udah besarok dudok berintai baka tangkai jelai pengerang.
Udah betugong baka adong,
Ngambu ngentong di sambong jala baru.
Nyau udah betugong maioh,
Baka beloh lubok dalam,
Ngambu nyelam di krangan ai chiru.
O-Hoi! O-Hoi! O-Hoi!
Nama kabuah kita nesau, kita ngangau?
Nama kabuah kita ngumbai, kita nyanggai?
Nama kabuah kita nungah, kita madah?
Pia deh ko Selampandai.
Eh! Kami tu bisi kabuah alai ngangau ka kita.
Kami tu ga bisi begelumu, bisi begulu.
Kami ngasoh kita mensiang batang tapang,
Tumboh di pampang jalai raya,
Ngambi ka berebut tepan singut.
Kami ngasoh kita melepa batang kara,
Ngambi ka menyala pansut bunga,
Enda begiut puput ka ribut.
Ngasoh kita ngidup ka ipoh,
Meda enda agi munoh,
Ngambi ke bebali pulai bisa,
Bal di nyawa, pait di mulut.
Kami tu minta tulong, minta sukong,
Minta imbai, minta gulai kita.
Ngasoh kita miau anak miau telasak,
Miau uchu, miau ambu kami.
Oh.. enti bakatu nama kabuah kami enggai.
Kami ka dulu nempap sida dara nelap,
Ngasoh bisi selingap selengka dada.
Kami ke dulu nempik lang burik,
Ngasoh bisi begilik leka mata.
Kami ke dulu ngerejang sida anak lantang,
Ngasoh bisi selambang lubang nyawa.
Kami ke ngaga idong antara mata,
Ngaga dilah antara nyawa,
Ngaga punggong antara pa.
Nya alai batu teladok tanah itam,
Enggau paputan kayu ruan bisi ga kami mai,
Selap pakan tekalong kangkang.
Teladok batu peputan nyepu,
Belabu ka bulu manok sidu, bisi ga kami mai,
Besiong ka lumpong buloh balang.
Nya alai kepai-kepai, kinda-kinda,
Bunsu Selampandai seduai Selampeta,
Miau ka selanjau manok lia,
Iya ga miau lantang buah timang anak engka,
Ngupas tuboh ke lelingoh baka bela.
Nya alai enti nuan nyau besai jemah ila,
Endang disadang sida menimang karong mengua,
Baka perapang pedang tempa,
Mantap mansa nampil ka janga bau nukang.
Nya alai kepai-kepai, kindong-kindong,
Selampandai tuai seduai Manang Chelong,
Miau ka selanjau manok tuntong.
Iya ga aku miau nuan uchu ambu,
Telesak anak di-indong.
Aku ga ngupas tuboh nuan,
Ngambi ka kukoh gamal gagendong.
Diatu nuan agi di sengkidang sida manimang karong kerubong,
Enggau ampang menyeti bali belumpong.
Tang enti nuan udah besai benong leligong,
Endang disadang sida menimang karong kerubong,
Megai perapang pedang bejengkong enggau enteran sangkoh agong,
Ngentong bradong ruang belakang.
Nya alai nuan tu udah kena tepas, kena kupas,
Kena eyas, kena kendas kami matai,
Kami Selampandai tukang milai,
Selampeta tukang nempa.
Nya alai enti nuan nyau besai benong jemanta,
Endang disadang sida mengua karong berada,
Bebasa enggau china, bepangan enggau tuan,
Be-aku’ enggau Datuk lalu bekelala enggau minister.
Tu kami Selampandai Tuai Selampeti api,
Deka pulai ngagai menoa kami di tisi langit lati,
Baka pua lebor api mansau tisi benyaang punggang.
Tu kami Selampandai Tuai Manang Chelong,
Nyau be-ati deka pulai ngagai menoa kami di kebong langit landong,
Lepong-lepong baka sempayong pagar bintang.
Letap-letap kantok emperingat,
Kami Selampandai Tuai Manang Rechap,
Deka ninggal ka ubat.
Kami ninggal ka batu lua sawa, panggum engkeruda.
Tu ga ubat gayu, ngambi ka gayu nguan menoa.
Kami ninggal ka keruntok tandok rusa periga,
Enggau taring uting lunchik juring babi menoa,
Ditinggal ka ba nuan deh lantang anak sendia,
Tau dikena nuan besekula,
Ngambi ka nuan enda berasai macha,
Bulih degree ari university bansa.
Nya alai batu takang bintang tiga,
Enggau batu selan bulan pernama,
Pan ditinggal ka aku ba nuan anak raja,
Kena nuan bekira ngalah ka china menang bedagang.
Nya alai selingkar akar randau bebelit,
Enggau batu buku semambu bepiet,
Ditinggal ka aku ba nuan,
Kena nuan ngiga duit,
Awak ka merenchit ninggang burit gudang wang,
Awak ka nuan baka langit bisi kebong,
Baka bukit bisi tuchong.
Nuan ditanggong Manang Chelong ngagai batu anggong,
Ngambi ka beruntong nguan menoa.
Dipanggai ka Manang Matai,
Ngagai batu chanai,
Ngambi ka tebantai jadi raja.
Disagu ka manang bidu,
Ngagai batu pampang saribu,
Ngambi ka gayu guru nguan menoa,
Gayu ko Sentuku,
Grai ko Selampandai,
Nadai apa ko Petara.
Angkat mengkajong nuan/kita bujang lempong,
Ngagai batu anggong lepong-lepong nampok di Tuchong Rabong Benama.

 Ilustrasi maik manik

Sumber:Lihat